ഹൃദയത്തിന്‍റെ ഉള്ളറകളില്‍ നിറയുന്ന നൊമ്പരമാണ് പ്രണയം. പൂവിനെ തണ്ടില്‍നിന്നു അടര്‍ത്തി മാറ്റുമ്പോള്‍ ഉണ്ടാകുന്നതുപോലെ, പ്രണയിനിയുടെ ചുണ്ടുകളെ ഒരു ചുംബനത്തില്‍ നിന്ന് സ്വതന്ത്രമാക്കുമ്പോള്‍ ഉണ്ടാകുന്നതുപോലെ സുഖദമായ, ആലസ്യമാര്‍ന്ന ഒരു നൊമ്പരം.
നേര്‍ത്ത മഞ്ഞു പെയ്യുന്ന , ഇളം തണുപ്പുള്ള , ഏകാന്തരാവില്‍ കാമിനിയുടെ മടിത്തട്ടില്‍ തലചായ്ച്ചു , സ്നിഗ്ധമായ മുടിയിഴകള്‍ക്കിടയിലൂടെ വിരലോടിക്കുന്ന മദാലസമായ അനുഭവമാണ് പ്രണയം.
അത് ഹൃദയങ്ങളുടെ ഭാഷയാണ്‌. മന്ത്രണങ്ങളുടെ മാറ്റൊലിയാണ് . സ്വപ്നങ്ങളുടെ ഉച്ചസ്ഥായിയിലുള്ള അനുഭൂതിയാണ്.
