date:n.a.a
എങ്ങോ കത്തിയമരുകയാണൊരു ചിത
എങ്ങോ കത്തിയമരുകയാണൊരു ചിത
ഏതോ ഓര്‍മ്മകളില്‍ പൊതിഞ്ഞ ചിത
അഗ്നിതന്‍ താണ്ഡവത്തില്‍ മറയും
ഇരുളും തണുപ്പും, ഉഗ്രതാപത്താല്‍
വിറകൊള്ളുമീ ഓര്‍മ്മകള്‍ പരിധൂസരം.
ഉയരങ്ങളില്‍ കഴുകന്മാര്‍ പറക്കവേ
ഓര്‍മ്മകള്‍തന്‍ കനലെരിഞ്ഞൊടുങ്ങി
മറവിതന്‍ ശരമേറ്റു കീഴടങ്ങി തപ്തമെന്‍
മനസ്സിലെക്കാലത്തെയുമെന്നത്തെയും
പോലെ ഞാന്‍ കാത്തയെന്നോര്‍മ്മകള്‍
അവളായിരുന്നെന്‍ അനുരാഗപൂര്‍ണ്ണിമ
അവളായിരുന്നെന്‍ ഹൃദയസ്പന്ദനം
വസന്തങ്ങളില്‍ ആറാടിയ സ്വപ്‌നങ്ങള്‍
അവളായിരുന്നെന്‍ ഹൃദയകാര്‍ത്തിക
ഓര്‍മ്മകള്‍തന്‍ സുവര്‍ണ്ണതേരിലേറി
ഏതോ അജ്ഞാത തീരത്തേക്ക് ഞാന്‍
പ്രിയേ, നിന്നെയോര്‍ത്ത് കുതിക്കവേ
മനസ്സില്‍ മായാതെ മങ്ങാതെ നിന്‍രൂപം
ഉഗ്രപ്രഭയോടെ പ്രകാശിക്കുന്നു.
ആ പ്രകാശധാരയില്‍ ഞാന്‍ നോക്കവേ
എന്നെത്തന്നെ വിസ്മരിക്കുന്നു.
ഈ അജ്ഞാതതീരത്തിലെത്താന്‍
ഇനിയുമെത്ര കാലം കാത്തിരിക്കണം ഞാന്‍.
നീയോ മൃതേ, എന്‍ വേദനകണ്ടു
പുഞ്ചിരിക്കുന്നു, നീ ആഹ്ലാദിക്കുന്നു.
ഞാനനുഭവിക്കുന്ന വേദന എങ്ങനെയറിയും,
നീ നിത്യശാന്തിയില്‍ ലയിച്ചവള്‍, നിഹത.
നിന്റെ ചിത കത്തിയമരുകയാണെന്‍
ഹൃത്തിനെ അഗ്നിക്കിരയതാക്കുന്നു.
ഇനിയും കത്തിത്തീര്‍ന്നിട്ടില്ലീ ചിത
ഒരുനാളും കത്തിയമരുകയില്ലീ ചിത
അന്ത്യം വരേയ്ക്കും അതെന്നെയതിന്റെ
ഉഗ്രതാപത്താല്‍ ചുട്ടുപൊള്ളിക്കും.
എന്‍ വേദന തന്നുച്ചകോടിയില്‍
പുളയുന്നു ഞാന്‍ നിരന്തരം.
എന്നില്‍ നിന്നകന്നു നീ, എന്നെ ഏകനാക്കി
ധരയില്‍ എനിക്ക് തുണയിന്നാരുണ്ട്‌.
എന്നില്‍നിന്നെന്തിനു പിരിഞ്ഞു നീ
വിധിതന്‍ കരാളഹസ്തം നമ്മെ
അകറ്റിയതസൂയ കൊണ്ടോ, പ്രിയതമേ.
ഇതാ ഞാന്‍ കാത്തിരിക്കുന്നു
നിന്നിലേക്ക്‌ ഞാനലിയുന്ന
സുന്ദരമുഹൂര്‍ത്തത്തിനായി.
ചുറ്റിനുമോര്‍മ്മകള്‍ പറന്നീടവേ
അവ താപത്താലെന്നെ ചുട്ടുപൊള്ളിക്കുന്നു.
ഓര്‍മ്മകള്‍, ഓര്‍മ്മകള്‍ ഭ്രാന്തു പിടിക്കു-
മോര്‍മ്മകള്‍, നിന്റെ ഓര്‍മ്മകള്‍
അതെന്നില്‍ അഗ്നിപര്‍വ്വതമായി
പുകയട്ടെ, ആ പുകയില്‍ അലിഞ്ഞു
ഞാന്‍ മറ്റൊരഗ്നിപര്‍വ്വതമായി
പൊട്ടിത്തെറിച്ചു അന്ത്യം പ്രാപിക്കട്ടെ.
^^^^^^^^^^^^^^^^^^^^^^^^^^^^^^^
